1962లో చైనా భారత్పై ఆకస్మిక దాడి చేసినప్పుడు దేశం తీవ్ర సంక్షోభంలో పడింది. ఆ సమయంలో సైన్యానికి వెన్నుదన్నుగా నిలవడంలోనూ, పౌరరక్షణ బాధ్యతలను భుజాన వేసుకోవడంలోనూ RSS ప్రదర్శించిన దేశభక్తి చిరస్మరణీయం. ఈ మొత్తం ప్రక్రియలో సంఘ్ ద్వితీయ సర్సంఘ్చాలక్ శ్రీ గురూజీ (ఎం.ఎస్. గోల్వాల్కర్) మార్గదర్శకత్వం అత్యంత కీలకంగా నిలిచింది.
పూజనీయ శ్రీ గురూజీ ముందస్తు హెచ్చరికలు:
చైనాతో 1962 నాటి యుద్ధ సమయంలో శ్రీ గురూజీ ప్రదర్శించిన దార్శనికత కేవలం యుద్ధానికే పరిమితం కాలేదు, అది దేశ భద్రతపై ముందస్తు హెచ్చరికగా నిలిచింది. యుద్ధం ప్రారంభానికి చాలా ఏళ్ల ముందే చైనా ఉద్దేశాలను శ్రీ గురూజీ పసిగట్టారు. 1950లో చైనా టిబెట్ను ఆక్రమించుకున్నప్పుడే, గురూజీ అప్పటి ప్రభుత్వాన్ని హెచ్చరించారు. "చైనా విస్తరణకాంక్ష గల దేశం, అది త్వరలోనే భారత్పై దాడి చేస్తుంది" అని ఆయన స్పష్టంగా చెప్పారు. భారత్-చైనాల మధ్య జరిగిన 'పంచశీల' ఒప్పందాన్ని ఆయన తీవ్రంగా వ్యతిరేకించారు. "శాంతి మంత్రాలు జపించే దేశం తన సైనిక శక్తిని పెంచుకోకపోతే, పొరుగు దేశాల దాడులకు బలికాక తప్పదు" అని ఆయన హెచ్చరించారు.
 |
| గురూజీ |
చైనా అనుసరించే కమ్యూనిస్ట్ సిద్ధాంతం పొరుగు దేశాలను ఆక్రమించుకోవడమే లక్ష్యంగా ఉంటుందని, కాబట్టి చైనాతో స్నేహం కేవలం ఒక భ్రమ అని ఆయన వాదించారు. అప్పటి ప్రభుత్వం అనుసరించిన "హిందీ-చీనీ భాయ్ భాయ్" నినాదాన్ని ఆయన తప్పుబట్టారు. హిందీ-చీనీ భాయ్ భాయ్ నినాదం దేశాన్ని నిద్రపుచ్చుతుందని, వాస్తవ పరిస్థితులను మరుగున పరుస్తుందని ఆయన విమర్శించారు. శత్రువు గుమ్మం దగ్గర ఉన్నప్పుడు శాంతి వచనాలు పనికిరావని ఆయన భావించారు. దేశం ఎప్పుడూ యుద్ధానికి సిద్ధంగా ఉండాలని, సైన్యాన్ని ఆధునీకరించాలని ,సరిహద్దుల్లో మౌలిక సదుపాయాలను మెరుగుపరచాలని ఆయన సూచించారు.
సరిహద్దుల్లో స్వయంసేవకుల సేవ..
యుద్ధం ప్రారంభమైన వెంటనే, గురూజీ దేశవ్యాప్తంగా ఉన్న స్వయంసేవకులకు పిలుపునిచ్చారు. రాజకీయాభిప్రాయాలను పక్కన పెట్టి, ప్రభుత్వానికి, సైన్యానికి పూర్తి స్థాయిలో సహకరించాలని సూచనలిచ్చారు. ఆ పిలుపుతో చాలామంది సంఘ స్వయంసేవకులు సరిహద్దు ప్రాంతానికి వచ్చి, సరిహద్దు ప్రాంతాల్లోని అస్సాం, లడఖ్ వంటి చోట్ల సైనికులకు ఆహారం అందించడం, బంకర్ల నిర్మాణంలో సాయపడటం, మందుగుండు సామగ్రిని మోయడంలో తోడ్పడ్డారు.
పోలీసులు సరిహద్దు విధులకు వెళ్లడంతో, నగరాల్లో ట్రాఫిక్ నియంత్రణ, ప్రభుత్వ కార్యాలయాల భద్రతను ఆర్ఎస్ఎస్ కార్యకర్తలు చూసుకున్నారు. ఇక యుద్ధంలో గాయపడిన సైనికుల కోసం దేశవ్యాప్తంగా భారీ స్థాయిలో రక్తదాన శిబిరాలు నిర్వహించారు. ప్రజల నుండి నిధులు మరియు ఉన్ని వస్త్రాలను సేకరించి సైన్యానికి పంపారు.
ప్రభుత్వ గుర్తింపు, 1963 గణతంత్రదినోత్సవ ఆర్ఎస్ఎస్ కవాతు:
RSS కార్యకర్తల నిస్వార్థ సేవను, క్రమశిక్షణను చూసి అప్పటి ప్రధానమంత్రి జవహర్లాల్ నెహ్రూ ఆశ్చర్యపోయారు. సంఘంపై ఉన్న గత విభేదాలను పక్కన పెట్టి, 1963 జనవరి 26న జరిగిన గణతంత్ర దినోత్సవ కవాతులో పాల్గొనాల్సిందిగా ఆర్ఎస్ఎస్ను ఆహ్వానించారు. కేవలం మూడు రోజుల నోటీసుతో 3,000 మంది స్వయంసేవకులు తమ పూర్తి గణవేషంతో కవాతులో పాల్గొని దేశం పట్ల తమ నిబద్ధతను చాటారు.
1962 యుద్ధం ఆర్ఎస్ఎస్ కేవలం ఒక సాంస్కృతిక సంస్థే కాదని, దేశం ఆపదలో ఉన్నప్పుడు ప్రాణాలకు తెగించి సేవ చేసే శక్తి అని నిరూపించింది. శ్రీ గురూజీ దార్శనికత, స్వయంసేవకుల శ్రమ భారత రక్షణ చరిత్రలో ఒక ముఖ్య ఘట్టంగా నిలిచిపోయాయి.
